La chanzun rumantscha

festival il program

venderdis, ils 15 da mars 2019

20:00 – 23:00

Avertura e concert cun differents chantauturs rumantschs

Center communal Trun: Avertura dal festival
La scena dals chantauturs rumantschs viva pli che mai. Quai ei in fatg zunt legraivel! Els han maun liber per sa preschentar en in concert.

Suttetg casa da scola, caplutta s.Onna e sala d’art:
Concert cun Astrid Alexandre, Sidonia Caviezel, tumasch è (Thomas Cathomen), Fiona Cavegn, Pascal Gamboni e Dario Hess.

sonda, ils 16 da mars 2019

09:30 – 10:15, Center communal Trun

Cant en famiglia – concert e cant aviert

L’emprim ed il pli impurtant impuls per far musica survegnan ils uffants da lur dachasa, en famiglia. Ensemen cun il Chor d’affons Sumvitg (direcziun: Flavia Walder) e cun il Chor d’affons Surselva (direcziun: Rilana Cadruvi Scherrer) chantain nus chanzuns d’uffants. Ina occurrenza per pitschen e grond, per giuven e vegl.

10:45 – 11:15, Center communal Trun

Corin Curschellas & Fränzlis da Tschlin

Preschentaziun dal nov dc «1,2,3 dai & hop»

Tant geograficamain sco linguisticamain èn Corin Curschellas da la Surselva ed ils Fränzlis da Tschlin da l’Engiadina Bassa uschè lunsch in ord l’auter sco quai è mo pussaivel en il Grischun. Las/ils sis musicantas e musicants passiunads sa chattan dentant en la musica e las bellas, schregas, allegras e tristas chanzuns d’uffants en tut ils idioms rumantschs. Quellas han els rimnà ed arranschà per in program da concert per famiglias e per in disc cumpact dubel (DCD). Il nov DCD «1,2,3 dai & hop!» vegn preschentà ils 16 da mars 2019 a chaschun dal concert dals Fränzlis da Tschlin e da Corin Curschella a Trun.

14:00 – 16:00, Center communal Trun

Concurrenza da novas cumposiziuns

Final da la concurrenza da cumposiziun da chors. Trais chors ad hoc chantan mintgamai quatter canzuns da mintga gener (chor d’uffants, chor maschadà e chor viril) ch’èn vegnidas tschernidas e premiadas d’ina giuria. Era il public dastga dar la vusch a sia chanzun preferida e premiar «la chanzun dal public».

20:00 – 22:00, Center communal Trun

Concert da gala

Corsin Tuor cun la Brass Band Berner Oberland (BBO), incantanti e cantus firmus surselva preschentan «Perlas rumantschas III»

Ils onns 2006 e 2013 ha la chasa editura «Musikverlag lucerne music edition» (LME) producì – en collavuraziun cun Radiotelevisiun Svizra Rumantscha (RTR) – ils dus portatuns «Perlas rumantschas I» e «Perlas rumantschas II». Suenter l’emprima producziun instrumentala cun Brass Band è la Brass Band vegnida cumplettada tar las «Perlas rumantschas II» cun in ensemble vocal dad umens.
L’enviern 2019 vegn Corsin Tuor, l’iniziant e manader musical da la producziun Perlas rumantschas, a cumplettar la trilogia. La terza producziun è tant culminaziun sco era finiziun da quest project. «Perlas rumantschas III» unescha chant da chor maschadà cun Brass Band e stgaffescha uschia ina punt tranter questas duas pitgas impurtantantas da nossa cultura da musica en il Grischun.
Medemamain sco primaudiziun èn d’udir trais cumposiziuns dal cumponist da renum internaziunal Ivo Antognini cun texts d’Arnold Spescha.

22:00 – 23:00, Sala da cultura Trun

Cant aviert

Suenter il concert stain nus da cumpagnia cun Ursin Defuns e Gion Andrea Casanova e chantain chanzuns popularas da tut las regiuns rumantschas.

dumengia, ils 17 da mars 2019

11:00 – 12:00, Center communal Trun

Matinée «La canzun d’art romontscha»

Noss cumponists da professiun han scrit numerusas e grondiusas cumposiziuns per chant solistic. Cumposiziuns ch’èn per part anc nunenconuschentas. Fitg blers chantadurs da professiun tschertgan adina puspè nova literatura. Nus vulain menar ensemen quels dus munds – ils cumponists ed ils interprets – en in concert.

Sin tribuna: Lothar Burtscher (bariton), Sara-Bigna Janett (sopran) Judit Scherrer (sopran), Alena Sojer (piano). D’udir èn primaudiziuns e chanzuns che vegnan preschentadas darar d’Armon Cantieni, Gion Antoni Derungs e Beni Dolf.

12:30 – 13:30, Center communal Trun

Discussiun da podi

Iso Albin, Astrid Alexandre, Peter Appenzeller, Laura Decurtins e Beni Vigne filosofeschan davart «l’olma rumantscha» e la situaziun generala dal chant e da la musica en terra rumantscha. Manader da la discussiun: Martin Gabriel

Fin da l’emprim Festival da la chanzun rumantscha

Surdada da l’organisaziun
dal segund Festival da la chanzun rumantscha

festival concurrenza da cumposiziun

En il rom dal festival vegn organisada ina concurrenza da cumposiziun per novas chanzuns rumantschas per chors. Finamira: Metter a disposiziun als chors rumantschs – ed a tut ils chors interessads – novas chanzuns rumantschas. Antruras eran quai savens cumponists na-rumantschs, per il pli da lingua tudestga, che han scrit chanzuns rumantschas. Ord quest motiv lain nus era animar cumponists ch’èn betg da lingua rumantschs da participar a la concurrenza e da metter en musica texts rumantschs.

LA CONCURRENZA È TERMINADA.
Las chanzuns selecziunadas vegnan preschentadas sonda, ils 16 da mars 2019 (guarda program dal festival).

Participaziun: Participar pon tuttas cumponistas e tuts cumponists, independent da la vegliadetgna e da la naziunalitad.

Categoria: En mintga categoria po vegnir inoltrada sulettamain ina cumposiziun/ina chanzun.

Publicaziun: La chanzun na dastga betg vegnir publitgada, producida e preschentada enfin la fin da la concurrenza.

Giuria: Ils commembers da la giuria na dastgan betg participar a la concurrenza.

Categorias: La concurrenza vegn publitgada per trais categorias: Chor d’uffants (1 – 3 vuschs, accumpagnament da clavazin pussaivel), chor maschadà e chor viril (3 ubain 4 vuschs, a cappella).

Grad da difficultad: Lev.

Durada: 2 – 4 minutas.

Texts: A disposiziun stattan texts en ils tschintg idioms ed en rumantsch grischun (cun translaziun tudestga). Las cumponistas ed ils cumponists pon dentant era sez eleger in text rumantsch.

Quatter copias da las chanzuns senza indicaziun dal num/autur. Il num vegn remplazzà sin la partitura cun quatter cifras. Agiuntà vegn ina cuverta serrada – sin la vart davant vegn nudada la medema cifra sco sin la partitura. In fegl cun las coordinatas da la cumponista/dal cumponists: Num, prenum, adressa, numer da telefon, e-mail.

Trametter fin glindesdi, ils 11 da zercladur 2018
(data dal bul postal) a:
Festival da la Chanzun Rumantscha
Christoph Cajöri
Bollstrasse 31
5442 Fislisbach

Per mintga categoria datti trais premis:

1. premi:
frs. 1500.–

2. premi:
frs. 1000.–

3. premi:
frs. 500.–

La giuria consista da trais musicistas/musicists da professiun, renconuschids en la scena da chors. Las decisiuns da la giuria na pon betg vegnir contestadas. I na dat nagina correspondenza da la concurrenza e la via giuridica è exclusa.

Or da las chanzuns inoltradas selecziunescha la giuria mintgamai quatter cumposiziuns. Trais chors ad hoc emprendan las quatter chanzun da las differentas categorias (chor d’uffants, chor maschadà, chor viril) e preschentan quellas a chaschun da l’occurrenza finala al publicum, Silsuenter elegia il public en sala «la chanzun dal public». Las chanzuns ch’èn vegnidas selecziunadas vegnan edidas e stattan a disposiziun a chors interessads.

Chor maschadà

1. premi: Fortunat Frölich (cun la chanzun «Nots»)

2. premi: Isidor Lombriser (cun la chanzun «Tgisà»)

3. premi: Gion Andrea Casanova (cun la chanzun «Aurora»)

4. premi: Albert Spescha (cun la chanzun «Ei pluschigna»)

Premi dal public: Gion Andrea Casanova

Chor d’uffants

1. premi: Fortunat Frölich (cun la chanzun «I vain prümavaira»)

2. premi: Stephan Hodel (cun la chanzun «Anemona alva»)

3. premi: Flavio Bundi (cun la chanzun «Mumma»)

4. premi: Cyrill Schürch (cun la chanzun «I vain prümavaira»)

Premi dal public: Flavio Bundi

Chor viril

1. premi: David Lang (cun la chanzun «E morts ei il poet»)

2. premi: Isidor Lombriser (cun la chanzun «Il nausch vischin»)

3. premi: Markus Fricker (cun la chanzun «Ruinaulta»)

4. premi: Rico Peterelli (cun la chanzun «Saleid allas alps»)

Premi dal public: David Lang

Notas chor maschadà

Las partituras da las chanzuns inoltradas per la concurrenza da cumposiziun dal Festival da la chanzun rumantscha 2019 pon vegnir telechiargiadas e copiadas gratuitamain fin il mars 2020. Silsuenter èn quellas da chattar sin la plattafurma chorlitteratur.ch. Chanzuns che vegnan duvradas per concerts ed autras occurrenzas ston sa chapescha vegnir annunziadas a la SUISA.

Nots (Fortunat Frölich)

Tgisà (sursilvan) (Isidor Lombriser)

Tgisà (surmiran) (Isidor Lombriser)

Aurora (Gion Andrea Casanova)

Ei pluschigna (Albert Spescha)

Carriera (Claudio Simonet)

Crei quei a mi (Luis Coray)

La bellezia (Pascal Gamboni)

Al cant dal cük (Rico Peterelli)

Al cant dal cük (chor dubel) (Rico Peterelli)

Canzun (Sami Lörtscheri)

Ti eis tgeua, cara sera (Thomas Tschuor)